Parte hartzea sustatzeko asmoz egin dute azken harrera ofiziala

Donostiako Udal Gobernuak kirol, ingurumen, kooperazio, eta giza eskubideen alorreko eragile sozialei atzo harrera ofiziala egin zien, «elkar ezagutzeko eta parte hartzea» sustatzeko asmoarekin. Juan Karlos Izagirre Donostiako alkateak adierazi zuen irailetik aurrera eragileekin bilerak egiten hasiko direla, ondoren erabaki politikoak hartzeko.

Horrela, irailetik aurrera lan egutegia zehaztu ondoren, auzoetan bilduko dira eragile sozialekin, parte hartzea eta informazioa ardatz hartuta, lan programa finkatzeko. Udal gobernua ezkerrekoa izanik, ezkerreko politika aurrera eramateko prest azaldu zen Izagirre, eta, era horretan, lan baldintza duinak bermatzen dituzten neurriak hartzeko prest azaldu zen.

Harreran, baina, ez ziren izan Covite biktimen elkartea eta Gregorio Ordoñez Fundazioa. Cristian Matias Coviteren ordezkariak adierazi du harrerara joateko gonbidapena jaso zutela, baina Bilduk agintzen duen udalek antolatutako ekitaldietara joatea baztertu dutela. Izan ere, elkarte horren esanetan, Bilduk «oraindik ez du ETAren atentatu bat bera ere gaitzetsi».

Era berean, Consuelo Ordoñez Gregorio Ordoñez PPko zinegotzi izandakoaren arrebak adierazi zuen bere anaiaren izena daraman fundazioak ez zuela harrera ofizialean parte hartuko.