Egin dute hondakinak biltzeko sistemaren inguruko galdeketa Legazpin, Gipuzkoan. 7.115 pertsona zeuden deituta botoa ematera —herrian erroldatuak eta bertan hondakinen tasak ordaintzen dituztenak—, eta horietatik 3.683 joan ziren bozkatzera herenegun eta atzo: hautesleen %51,76.
Botoa eman dutenen artean, atez ateko sistemaren kontrako eta bosgarren edukiontziaren aldeko jarrera nagusitu da. 3.599 pertsonak egin dute atez atekoaren aurka; botoa eman dutenen %97,72, eta hautesleen %50,58. 61 pertsonak egin zuten atez atekoaren alde, eta 23 boto baliorik gabekoak izan ziren.
'Birziklapena bai, atez atekorik ez' plataformak antolatu du galdeketa, eta gaur eramango dizkio emaitzak Legazpiko Udalari.
