Jose Antonio Pastor PSE-EEko bozeramaileak gaur Gernikako Akordioaren sinatzaileei erantzun dienez, "ETA da bere presoen eskubideen aurka egiten duena, ez [Espainiako] Gobernua. Honek zorrotz betetzen du espetxe politika". Pastorrek uste du erakunde armatuak kartzeletako abantailak hartzea eragozten diela presoei.
Gernikako Akordioaren ordezkariak Madrilera joan ziren atzo, Mercedes Gallizo Espainiako Espetxe Zaintzarako zuzendariarekin biltzeko asmoz, baina honek ez zituen hartu. Gutuna utzi zioten, euskal presoen eskubideen inguruan akordioak dioena betetzeko eta EPPKrekin biltzeko dituzten oztopoak eteteko eskatuz.
