Rodolfo Ares Eusko Jaurlaritzako Herrizaingo sailburua Espainiako Justiziak Patxi Gomez Lopezi kartzela zigorra luzatzearen aurka azaldu da gaur, Eusko Legebiltzarrean, Juanjo Agirrezabala EAko legebiltzarkideak euskal presoei zigorrak luzatzeari buruz egindako galderari erantzunez. Aresek esan du ez duela bat egiten kasu horrekin.
Gomez preso ohia joan den otsailaren 9an atzeman zuten, Auzitegi Gorenak luzatutako espetxe zigorra bete dezan. Gomezek hogei urte egin zituen preso, eta 2009an irten zen espetxetik; orain, beste hamar urterako espetxeratuko dute, Parot doktrina delakoa ezarri diotelako.
Agirrezabalak adierazi du Espainiako Gobernuak espetxe politika "mendeku" gisa erabiltzen duela.
Patxi Lopez Jaurlaritzako lehendakaria ez da bat etorri EAko kidearen iritzi horrekin. Lopezek berriro esan du "espetxe politika inteligentea" ezarri behar dela egoera politiko berrian, ETAk eta "haren inguruak" "mendekua ez den politika horrekin biktimismorik egin ez dezaten". Estrategiaren aldaketa "Zuzenbide Estatuaren barruan" egin beharko litzateke, haren arabera.
Eusko Legebiltzarrean egin ditu adierazpenok lehendakariak, Antonio Basagoiti EAEko PPko presidenteak "terrorismoari zilegitasuna kentzeko" zer asmo duen galdetu dionean.
Datorren ostegunean bakerako ekinaldi berriak azalduko ditu Lopezek, legebiltzarrean bertan.
Herrira mugimenduak eta beste eragile askok gaurko espetxe politika eskatzen dute. Besteak beste, presoak Euskal Herriratzeko eta zigorraren hiru laurdenak edo bi herenak beteta dituztenak, gaixotasun larriak dituztenak eta zigorra beteta eduki arren kondena luzatu dietenak askatzeko.
