Gaur goizean atxilotu du Guardia Zibilak Xabier Otegi tolosarra, etxean; "terrorismoa" goratu izana egozten diote. Maiatzaren 8an, AHTaren inguruko solasaldi batean parte hartu zuen Info7 irratian. Solasaldian egindako adierazpenengatik atxilotu dute.
Guardia Zibilaren esku dago orain, eta espero da bihar deklaratzea epailearen aurrean. Espainiako Zigor Kodearen arabera, delitua da terrorismoa goratzea; kartzela zigorra eta inhabilitazioa ezar diezaiokete. Apirilaren bukaeran, hamabost pertsona atzeman zituen Guardia Zibilak Euskal Herrian, sare sozialetan terrorismoa goratzea leporatuta.
Tolosaldeko AHT Gelditu Elkarlana-k Otegiren atxiloketa salatu du. "Onartezina" deritzo egunerokotasunean egiten dituzten "legez kontrako ekintzengatik" zigorrik ez izateari, eta "AHTaren aurkako mugimendua behin eta berriz kriminalizatuz, errepresio lazgarria jasan behar izateari".
EH Bilduk salatu duenez, atxiloketak ez du "inolako justifikaziorik", eta Otegi berehala aske uzteko eskatu du. Horrez gain, Guardia Zibila "Euskal Herritik atera" eta "estrategia bortitza" alde batera uztea galdegin dio Espainiako Estatuari.
