Ertzaintzak Imanol Gonzalez Pardo 24 urteko gaztea atzeman du gaur goizeko zazpietan, etxetik ateratzekotan zela, kale erasoak leporatuta. Bizkaian atxilotu dute Gonzalez Pardo, Balmasedan, eta haren etxea eta beste bi lokal miatu dituzte ondoren. Litekeena da miaketa gehiago egitea, Ertzaintzaren beraren arabera.
Eusko Jaurlaritzako Herrizaingo Sailak jakinarazi duenez, martxoaren 29ko greba egunean Lanestosako autobus baten azpian lehergailu bat jartzea egotzi dio Ertzaintzak Gonzalez Pardori. Poliziek goiz hartan topatu zuten lehergailua autobusaren azpialdean. Espainiako Auzitegi Nazionalera eramango dute.
