Istripu bat gertatu da A-12 errepidean Erreniegako tunelean (Nafarroa), Iruñerako norabidean, eta ibilgailu batek su hartu du. Bertara joan dira suhiltzaileak, Foruzaingoa eta hainbat anbulantzia. Pertsona bat zauritu da, eta erietxera eraman dute.
15:25 aldera gertatu da istripua, Nafarroako Gobernuaren arabera. Kilometro bateko luzera du tunelak. Auto batek tunelaren alde bat jo du, eta su hartu du. Hasiera batean, exekutiboak ohartarazi du auto bat baino gehiago izan direla su hartu dutenak, baina bakarra izan da.
Errepidea itxi egin dute badaezpada, eta NA-1110 bidetik bideratu dute zirkulazioa.
