Gervasio Gabirondo Ertzaintzaren zuzendariak "lehenbailehen" argitu nahi du Cabacas auzia. Euskadi Irratian elkarrizketatu dute Gabirondo. "Inori ez zaio interesatzen gai honekin bueltaka ibiltzea". Ikerketa luzatzen ari dela onartu du, baina auzia korapilotsua dela zehaztu du: "Ez da erraza jakiten nork bota zuen pilotakada".
Gabirondoren ustez, Iñigo Cabacas hil zuen pilotakada bota zuen ertzaina identifikatuta itxiko da ongi auzia. "Nork eta zein egoeratan egin zuen jakitean".
Haren ustez, goi arduradunei ezin zaie gertatua leporatu, halako egoeretan bertan unean daudenek hartu behar dituzte-eta erabakiak. "Kanpotik agintzea zaila da". Dena dela, Cabacas hil zuten unean hartutako erabakia ez du egokitzat jo: "Kaltea handiegia izan da lortu nahi izan zenarekin konparatuta".
Gaur deklarazio gehiago
Atzo, Cabacas auzian inputatuta dauden bost ertzainetatik bik deklaratu zuten. Gaur, gertaerak berregiteko lanean ibili ziren Espainiako bi poliziak deklaratu dute.
