Gutun bat argitaratu dute Hondarribiko Emakumeek Denis Itxasori zuzenduta. Alarde parekidearen kontrako andrazkoak batzen dira elkarte horretan, eta Jaizkibel konpainiaren aurka daudela erakusteko arbuio keinuak defendatzen dituzte, tartean, haiek Kale Nagusian igarotzen direnean, plastiko beltz bat zabaltzea. Badira 22 urte gatazka hasi zela, eta harekin keinu itsusiak; orain arte ez zien inoiz, ordea, aldundiak zuzenean eskatu halakorik ez egiteko. Atzo heldu zen era horretako lehen keinua, Itxaso Kultura diputatuaren adierazpenak dituen ohar batekin. Eta minduta hartu dute komunikatua tradizioren defentsan ari direla dioten emakumeek. "Plastikoak, harresi beltzak, emakumeen indar pasiboaren sinbolo unibertsal bat dira", defendatu dute. Adierazpen askatasuna aldarrikatu dute, eta instituzioen partetik jasaten duten "bazterkeria" erakutsi egin behar dutela.
Adierazi dute Itxasok emakumeen ahotsa isilarazi nahi duela egin duen eskariarekin. Horregatik, hark "eraso" egin diela sentitu dute, eta "zentsuratu" egin nahi dituela haien iritziak. "Konturatzen zara zure adierazpenekin ikusezin egin nahi dituzula herri honetako emakume gehienak?".
