Ototisa, pneumonia eta kasurik larrienean meningitisa sor dezakeen pneumokokoaren kontrako txertoa jartzeko kanpaina hasiko du datorren hilaren lehenean Osakidetzak. Aurten jaiotako haurrekin hasiko dute txertaketa Araba, Bizkai eta Gipuzkoan.
Lehen dosia bi hilabeteko haurrentzat eskainiko dute; haur horiek lau hilabete eta hamabi hilabete betetzen dituztenean, beste bi dosi hartzeko aukera izango dute. 2015eko urtarrilaren 1aren ondoren jaio eta jada zenbait dosi hartu duten haurrek ere izango dute aukera falta zaien dosia Osakidetzaren bidez hartzeko, doan.
Giza papilomaren kontrakoa, lehenago
Giza papilomaren kontrako txertoa hartzeko adina jaitsi egingo dute. Aurrerantzean, 12 urteko neskatxoei jarriko diete.
Jon Darpon Osasun sailburuak esan du oraingoz ez dutela aurreikusten barizelaren kontrako txertoa 10 urtetik beherako haurrei jartzea, "ez baitago izurriterik". Nafarroan, urte eta erdiko haurrei jartzen diete lehen dosia.
