Egun hori izanen da Pobreziaren Aurkako Astearen bukaera. Azken egun hauetan ere ekitaldi anitz egin dituzte pobrezia eta bazterketa soziala salatzeko: hitzaldiak, tailerrak, mahai-inguruak, antzerki emanaldiak... Izaera anitzeko erakundeek -sindikatuek, kultur taldeek, GKE gobernuz kanpoko erakundeek...- antolatu dituzte ekimen horiek, eta haietariko anitz Zero Pobrezia plataforman bildu dira.
Gasteizen eta Iruñean, gaur eguerdian eginen dituzte ekitaldi nagusiak. Bilbon eta Donostian, berriz, bihar. Gasteizen, Probintzia plazatik abiatuta, Bizi-martxa antolatu dute, Gure pobrezia ezagutuz lelopean. Iruñean, Gazteluko plazan giza dominoa eginen dute, eta, ondoren, manifestu bat irakurriko dute. Biharko, Bilbon, Arriagan elkarretaratzera deitu dute, eta Donostian, Gasteizen bezala, Bizi-martxa eginen dute, Bulebarretik abiatuta.
Erruduna, sistema kapitalista
Zero Pobrezian bildu diren eragileek salatu dute «egungo sistema ekonomiko kapitalista eta patriarkala» dela pobreziaren eragilea. Eredu horri aurka egiteko bidea «deshazkundea» dela aldarrikatu dute. «Epe gutxirako onura ekonomikoa bilatu eta eragin ekologikoa handitzen duten jarduera ekonomikoak gutxitu behar ditugu, eta gizartearen beharrizanei eta ingurumenari lotutakoak areagotu. Gutxiago lan egin eta kontsumitu, lana banatu...». Eragileen aburuz, «gainezka egin duen ibaia bere bidera bueltatzean datza» deshazkundea.
Jangela «ekonomiko» bat irekiko dute etzi Barakaldon
Caritasek eta Antonio Menchaca de la Bodega elkarteak jangela «ekonomiko» bat zabalduko dute etzi Barakaldon (Bizkaia). Egunean euro bat pagatuta emango diete jatordua hara joandakoei. Caritasek edo gizarte zerbitzuek emandako txartel bat beharko da jantokira joateko. Ehun pertsonarentzat dago tokia.890.000
Hilabete amaierara justu heltzen direnak Araban, Bizkaian eta Gipuzkoan. Egoera ekonomiko kolokakoan egon eta hilabetearen amaierara larri antzean heltzen direnak 890.000 inguru badira Araban, Bizkaian eta Gipuzkoan. Eusko Jaurlaritzak emandako datua da.%70
Lanbide arteko gutxieneko soldatatik behera jasotzen duten alargunak. Araban, Bizkaian eta Gipuzkoan, hamar alargunetatik zazpik ez dute lanbide arteko gutxieneko soldatan ezarritakoa bezainbat diru jasotzen. Hilean 633 euroan dago gutxienekoa.%57
Hegoaldean pobreziaren mugatik beherakoa jasotzen duten pentsiodunak. Arabako, Bizkaiko, Gipuzkoako eta Nafarroako pentsiodunen %57k pobreziaren mugakoa baino gutxiago kobratzen dute. Hegoaldean, hileko 1.069 euroan jartzen du pobreziaren muga Elkartzenek.Elikagai bankuetan lan igoera «nabarmena» igarri dute
Beharrean daudenentzako elikagaiak banatzen dihardute elikagai bankuek. Soberakinak, iraungitze data gainditzear duten produktuak eta fabrikek salgai jartzen ez dituzten ekoizpenak banatzen dituzte. «Nabarmen» igarri dute eskari gehiago jasotzen ari direla azken urte hauetan. Jose Antonio Olabarriak eta Javier Agirregabiriak,esaterako, Gipuzkoako Elikagaien Bankuan dihardute. «Logistika lan handia da». 190 erakunderi banatzen dizkiete egun elikagaiak eta pentsatzen dute horiei esker 15.000 lagunek jaten dutela. Erakunde gehienek azkenaldian argi utzi diete premia handiagoak dituztela asetzeko: «Heltzen dira, eta esaten digute egunez egun jende gehiago dutela».Pobreziaren Nazioarteko Eguneko ekitaldi nagusiak
Gasteiz. Bizi-martxa, Probintzia plazatik abiatuta. Gaur, 13:00etan.Iruñea. Giza dominoa eta manifestuaren irakurketa Gazteluko plazan. Gaur, 14:00etan.
Donostia. Bizi-martxa, Bulebarretik abiatuta. Bihar, 12:00etan.
Bilbo. Arriagan. Bihar, 13:00etan.
