Bizilagun batek grabatutako irudiak aztertu dituzte perituek, Ana Torres epailearen aginduz. El Correo egunkariak argitaratu duenez, polizietako batek epailearen aurrean adierazi zuen ertzainetako baten posizioa "bateragarria" dela pilotakada gertatu zen lekuarekin, baina ezin dela jakin haren pilotakada nora joan zen. Martxoaren 2an aztertuko dute Espainiako Poliziaren txostena, eta, kazeta horren arabera, bertan ondorioztatu dute ezin dela jakin zein ertzainen pilotakadak hil zuen Iñigo Cabacas Athleticeko zalea.
Sei ertzain ikertu dituzte Cabacasen heriotzagatik: gomazko pilotak jaurti izana onartu duten hiru polizia, furgonetetako bi arduradun eta polizia etxetik operatiboa gidatu zuen ertzainburu bat. Duela bi aste auzipetu zuten seigarrena. Instrukzio faseari legez dagokion epea ekainean amaituko da, eta horren ondoren erabaki beharko dute epaileek auziarekin aurrera egin ala ez.
Athletic eta Schalke 04 taldeen arteko futbol partida baten ondoren izan zen Cabacasen heriotza eragin zuen karga, 2012ko apirilaren 5ean. Maria Diaz de Haro kalean bildutakoen aurka jo zuen Ertzaintzak, eta gomazko pilota batek buruan jo zuen Cabacas. Lau egunera hil zen, jasotako kolpearen ondorioz.
