Paxkal Indo Seaskako lehendakaria zuhurtziaz mintzatu da Paueko (Frantzia) bilkuratik atera ondoren. Haren arabera, Paueko prefetaren adierazpenak akordiorako gogoa adierazi du, baina baikortasunerako oinarririk eman gabe; izan ere, prefetak ezin du legea aldatu, betearazi baizik.
Paueko bilkura egin den tenore berean, 400en bat pertsona elkarretaratu dira Baionako Suprefeturaren aitzinean, Seaskaren aurkako erasoa salatzeko. Suprefetak duela pare bat aste esan zuen ikastolen gisako erakunde pribatuek legez ezin dutela diru laguntza publikorik jaso.
Seaska arratsaldean Colette Capdevielle diputatu sozialistarekin bilduko da, elkarrekin aztertzeko egin daitezkeen urratsak. Frantzian erreforma ugari daude abian; bertzeak bertze, hezkuntza arlokoa, lurralde antolaketa eta hizkuntza arloan aldaketak eragin ditzakeen Europako hizkuntza gutxituen ituna berresteko.
Gauean, Indo eta Gorostiaga Seaskako ikastoletako lehendakarien batzordearekin batzartuko dira. Paueko bilkuraren bilduma helaraziko diete, eta batzordeak deliberatuko du mobilizazioekin segitzen duten ala ez.
Larunbatean, hiru mila lagun bildu ziren Hendaiako manifestazioan, ikastolentzako laguntza publikoak ez etetea eskatzeko. Eragileen sostengu handia jaso zuen Seaskak.
