Dolors Bassa Kataluniako Generalitateko Lan Kontseilari ohiarekin bildu dira gaur ELAko ordezkariak, eta buruzagi independentistak aske uzteko eskatu du. Salatu duenez, "Espainian ez dago bide demokratikorik gehiengo katalan demokratikoentzat", eta oroitarazi du "soilik demokrazia gauzatu zutelako" jaso dutela Espainiako Estatuaren errepresioa: "Estatuak mugimendu independentistaren buruak paretik kendu nahi izan ditu, eta erabaki horrekin bat datoz Ciudadanos, PP eta PSOE".
Gaurko bisitaren ondoren, Lledonerseko espetxean izango dira bihar Muñoz eta Villareal, ANCko presidente Jordi Cuixartekin, Kataluniako Generalitateko presidenteorde ohi Oriol Junquerasekin eta Jordi Turull kontseilari ohiarekin biltzeko. "ELAk beti emango dio sostengua Kataluniari", nabarmendu du Muñozek, "etorkizuna askatasunez eta demokratikoki erabakitzeko eskubidea" duelako.
