PPk "beharrezkotzat" jo du Eusko Legebiltzarrak adieraztea preso politikorik, eta legez besteko proposamen bat aurkeztu du horretarako. "Beharrezkoa da Eusko Legebiltzarrak irmo baztertzea Espainian preso politikoak daudela dioten adierazpenak, gezurrezkoak eta legearen kontrakoak izateaz gain, gizarte demokratikoa iraintzen dutelako".
PPko legebiltzarkide Borja Semperrek eman du ekimenaren berri, Efe agentziak zabaldu duenez. Semperrek esan du "ezinezkoa" dela Espainiako estatuan inor bere iritzi politiko eta ideologikoengatik atxilotzea.
Presoei preso politiko deitzearekin "tematzea" aurpegiratu dio Semperrek ezker abertzaleari, eta uste du "ehunka hilketa eta krimen justifikatzea eta larritasuna kentzea" dela asmoa.
Gainerako alderdiek osoko zuzenketak aurkeztu dizkiote PPren proposamenari. EAJk argudiatu du bizkidetzak "oinarrizko adostasunak" behar dituela eta horiek bake lantaldean landu behar direla. EH Bilduk, berriz, proposatu du Eusko Legebiltzarrak bere egitea Amnesty Internationalek preso politikoez egiten duen definizioa. Erakunde horren arabera, preso politikoa da "elementu politikoren bat duena, bere ekintzen motibazioa, ekintza bera edo autoritateen motibazioa, kasurako".
PSEk ere proposatu du ebaztea Espainiako estatuan preso politikorik ez dela.
