Auzitegi Nazionalak iaz zigortu zituen Begoña Garro, Irene Rodero, Serafina Rey eta Juan Lopez. "Terrorismoa goratzea" egotzi zien. Urtebeteko zigorra eta zortziko inhabilitazioa ezarri zion bakoitzari.
2011ko urriaren 11n, Basaurin (Bizkaia), presoen argazkiak jarri zituzten, haien izenak azpian zituztela, Eskubide guztien jabe, Euskal presoak Euskal Herrira zioten orriekin batera.
Auzitegi Gorenak argudiatu duenez, Auzitegi Nazionalaren ebazpenean ez zen erreferentziarik egin "jardun terrorista sutatu, justifikatu edo goratzeko" moduko inolako ekintzarik; Gorenak argitu duenez, presoen alde jarritako kartelak "presoak gerturatzeko nahiaren adierazpena" dira. Hori "adierazpen askatasunaren" barnean kokatu du auzitegiak.
