Auzitegi Gorenak absolbitu egin du Aritz Arzallus, eta ebatzi du euskal presoen argazkiak jarrita ez zuela "terrorismoa goratu". 2011n Azpeitiko jaietan Gotzon Aranburu presoaren argazki bat jarri zuela-eta, espetxe zigorra ezarri zion Auzitegi Nazionalak Arzallusi. Ekintza horrekin, ordea, deliturik ez zuela egin uste du Auzitegi Gorenak, eta gaineratu du "zilegi den eskari bat" plazaratzeko asmoa baino ez zuela izan.
Fiskalak eskatu zuen urtebeteko espetxe zigorra bere horretan uzteko, eta defentsa abokatuak, berriz, argudiatu zuen Arzallusek ez zuela ETA goratzeko asmorik izan. "Ez zuen zentzu horretan inolako lelorik azaldu, soilik euskal presoak Euskal Herriratzeko eskatu zuen".
Auzitegiak frogatutzat jo du, beraz, Arzallusek Aranbururen argazkia jarri zuela, baina ez du uste "ETAko kideak goratzea" izan zenik bere asmoa, ezta "biktimak iraintzea" ere. Aranbururen argazkiaren ondoan "Gotzon herrira!" jartzen zuelako, Auzitegi Gorenaren arabera, presoak "euren etxeetatik gertu dauden espetxeetara eramateko nahia" adierazi nahi izan zuten pankarta horren bitartez.
