Nafarroako Ospitale Guneko garbiketa zerbitzua pribatizatuz joan dira azken urteotan. Nafarroako Ospitaleko langileak dira prozesu horretatik at gelditu diren bakarrak, 105 denera. Orain arte. Haiek eskaintzen duten zerbitzua ere pribatizatzeko asmoa du Nafarroako Gobernuak, Izaskun Arteaga langileak salatu duenez. Garbitzaileek elkarretaratzea egin dute gaur goizean erietxearen aurrean. Arteagak azaldu du gobernuak urte batean edo urte eta erdian egin nahi duela pribatizazio prozesua. "Langileok kalean geldituko gara".
Gobernuak pribatizazio asmoak justifikatzeko inolako txostenik ez duela aurkeztu nabarmendu dute garbitzaileek, eta Kontuen Ganberak agerian utzi duela zerbitzu publikoa pribatua baino merkeagoa dela. Osasun Departamentuko buru Marta Vera kontseilariaren kudeaketa kritikatu dute langileek, eta dimisioa eman dezala eskatu dute. Datozen asteotarako mobilizazioak iragarri dituzte, haien lanpostuen alde, eta herritar guztiak deitu dituzte parte hartzera. "Denon arazoa da, langileena, bai eta erabiltzaileena ere", erran du Arteagak.
