Patxi Lopez lehendakariaren Urtezahar gaueko mezuak ez du inor gustura utzi. Lopezek bakea eta ekonomia izan zituen hizpide, baina oposizioaren aldetik eta Eusko Jaurlaritzan babesten duen alderdi bakarraren aldetik kritikak besterik ez zituen jaso. Antonio Basagoiti EAEko PPren presidenteak esan zuen ETA ez dela oraindik desagertu eta Lopez bere buruarekin adeitsuegia dela.
Alderdi gehienek prozesu politiko berrian lidergoa ez hartzea aurpegiratu diote, ordea. Iñigo Urkullu EAJkoak apaltasuna eskatu zion, gainera, eta Pello Urizar EAkoak, ausardia. Ezker abertzaleak ohar baten bidez salatu zuen "Patxi Lopez errealitate politiko eta sozialetik erabat aldenduta eta bakarturik" bizi dela. Dani Maeztu Aralarrekoak hitzak utzi eta akordioak egitea galdegin zion.
