Donostiako Udalak Barrura begiratzeko leihoak bost euskal presoren inguruko film dokumentala 9.000 euroz laguntzea onartu du gaur, eta horren ondotik Donostiako Udaleko giza eskubideen batzordea uztea erabaki dute PSE-EEko eta PPko ordezkariek.
Carlos Urkijo Espainiako Gobernuko EAEko ordezkariak adierazi du auzitara eramango duela Donostiako Udala. Aurretik ohartarazi zuen udala laguntza onartzekotan neurriak hartuko zituela. Presoen inguruko dokumentala diruz laguntzeak, Urkijoren esanetan, Terrorismoaren Biktimak Babesteko 29/2011 Legeko 61. artikulua apurtuko luke. Horren arabera, "estatuak ezin dezake parte hartu terrorismoaren biktimak gutxiesten dituzten ekitaldietan".
