Maite Iturbe EITBko zuzendari nagusia izateko hautagaia izango da. Mikel Agirrek zuzendari nagusi izateko hautagaitzari uko egin ostean, EAJk Jaime Otamendi nahi zuen zuzendari. Proposamena, baina, ez da sozialisten gustukoa izan. Ez dute begi onez ikusi Otamendiren hautagaitza, orain lau urte, Patxi Lopez lehendakaria zela, hari eginiko elkarrizketa dela eta. Ondorioz, beto irmoa jarri diote. Gaur arratsaldean egindako bileraren ostean adostu dute bi alderdiek Maite Iturbe izatea zuzendari nagusia izateko hautagaia.
Gaur goizean EAJko goi kargu batek adierazi dio Otamendiri hautagaitza atzera botako dutela. Izan ere, bi alderdiek eginiko bileran ezezko borobila jaso du Otamendiren hautagaitzak, eta ondorioz, Maite Iturbe proposatu du EAJk. Presa du EAJk zuzendari nagusi lehen bait lehen aurkezteko, duela aste batzuk oraingo zuzendari nagusi Alberto Suriok Urkullu lehendakariari karguan ez betikotzeko eskatu baitzion.
Egun irrati eta telebista publikoaren ekoizpen buru eta Donostiako Miramongo egoitzako arduradun da Iturbe. Ekonomista ikasketez, 1989an hartu zuen kargu hori.
Ordutik EITBtik pasatako zuzendari nagusi guztiekin lan egin du. Etxe horretako zuzendari izendatzen badute, kargu horretako aurreneko emakumea izango litzateke.
