Espetxeko kideak ezin sinetsita daude, "lur jota", Jokin Zerain presoaren senideek adierazi dutenez; Bellonen ondoko ziegan da Zerain. Bazkalondoan agurtu zuten elkar Bellonek eta Zerainek, eta Elorriokoa "ondo", beti bezala zegoela azaldu du.
Arratsaldean berriz egotekotan geratu ziren Zerain eta Bellon; paseoan ibiltzekotan, Bellonek, egun horretan, kirola egin baino nahiago zuela eta. Zerainek 17:00etan jakin zuen hil zela, presoei ziegak berriz ireki zizkietenean. "Jokin ondoko txaboloan dago, eta esan du ez duela ezer arrarorik sumatu; ez dela inor sartu, bestela berak entzungo zuela", azaldu dute Zerainen senideek.
Bellonen heriotzaren berri izan ondoren espetxeko zuzendariordearekin bildu ziren haren moduluan dauden zortzi euskal presoak. Ondoren, Bellonen ziegan banan-banan sartu eta azken agurra ematen utzi zieten. Haren gauzak ere atera zituzten handik.
