TVE Espainiako telebista kate publikoan mintzatu da PPko Euskal Autonomia Erkidegoko presidente Arantza Quiroga, eta Vox alderdiaren sorreraren ondotik PPko hainbat kidek kargua utzi izanaz mintzatu da, batez ere. Azken egunetan, Aleix Vidal Quadras PPko zuzendaritzako kideak adierazi du alderdia utzi eta Voxekin bat egingo duela, eta Jaime Mayor Oreja PPko europarlamentariak iragarri du ez dela alderdiko zerrendaburu izango maiatzaren 25eko Europako Parlamenturako hauteskundeetan.
Quirogak azpimarratu du PP "beti egon den tokian" dagoela —"Espainia demokratikoaren interesak defendatzen"— eta azken egunetako gertakariak "uneotako garai gorabeheratsuen bitxikeriatzat" jo behar direla: "Ea politikan naturaltasun handiagoarekin ikusten hasten garen pertsonak momentu batez daudela eta gero bigarren lerrora igarotzen direla".
Nolanahi ere, alderdiko kide bat joateak "ez du esan nahi PPren printzipioak erortzen direnik", zehaztu du Quirogak, "atzetik beste batzuk baitatoz, lekukoa jasoz".
PP, "ETAren konplize"
Borja Semper PPko Gipuzkoako buruak, berriz, Maria San Gil alderdiko EAEko presidente ohiari egin dio kritika. San Gilek Espainiako Gobernua egin zuen Euskal Herrian bizi den "amesgaiztoaren" erantzule; kritika hori "bidegabea" iruditu zaio Semperri: "Horrela jarraituz gero, bihar esan dezake PP ETAren konplize dela edo ia-ia gu garela tiro egin dugunak".
