Arrazoi galanta zuen futbolean golek balio dutela esan zuenak. Jokoa ona bada, hobe, eta erakustaldia emateko aukera badago, zer esanik ez. Baina hori egin ezin denean, hortzak estutu eta irabazteak balio izaten du, eta atzo horixe egin zuen Realak Rosaleda zelaian. Partida hasiera bikain bati esker, 0-1ekoa egin zuen Velak 9. minutuan, eta aski izan zen hori hiru puntu eskuratzeko. Urrezko hiru puntu.
Hasierako hamaikakoarekin apustu arriskutsua egin zuen Jagoba Arrasatek. Canales eta Seferovic jarrita, talde erasokorra zelairatu zuen, eta asmatu zuen. Izan ere, neurketa bikain hasi zen txuri-urdinentzat. Lehen bi jokaldietan gola egiteko zo rian izan ziren, eta hirugarrenean ez zuen barkatu Velak. Pardok, Griezmannek eta Jose Angelek jositako jokaldi bati amaiera ederra eman zion penalti puntutik. Gol horrek ez zuen Realaren jokoa aldatu. Erasoan jarraitu zuen, ezeri uko egin gabe. Iraupen luzeko jabetzak izan zituen, eta Malaga urduri jartzea lortu zuen.
Partidaren orduerdia igarota, ordea, gora egin zuten etxekoek. Zaleen txistu hotsak entzunda edo, hobeto jokatzen hasi ziren, eta izan zuten berdinketa egiteko aukerarik. Pardo eta Canales desagertu egin ziren, eta sufritu egin zuen Arrasateren taldeak.
Bigarren zatia, luze
Bigarren zatiak lehenengoaren amaieraren ildo beretik jo zuen. Malagak lotsagabe jokatu zuen erasoan, eta 60. minuturako hiruzpalau aukera bikain alferrik galduak zituen. Realak kontraerasoan izan zuen min egiteko aukera. Griezmannen eta Velaren abiadura baliatuz, neurketa erabakitzeko aukerak izan zituzten, baina antzu aritu ziren azken fasean. Partidaren azken txanpan atzean sartu eta emaitzari eutsi zieten donostiarrek.
Hala, Europako postuetan sendo da Reala, Vila-real bosgarrenarekin berdinduta. Laugarren postua hiru puntura dauka.
