Astrainen balsarekin hasi da Riau-riau ez-ofiziala. Duela bi urte ez bezala, aurten ez da istilurik egon, eta jendetza elkartu da Udaletxe plazan. Besoak altxatu dituzte, ezker-eskuin mugitu, eta musika doinuei hitzak jarri dizkiete ehunka lagunek: "Hiri aintzagarri honen festak iritsi dira, mundu osoan parekorik ez dutenak...".
Orain bi urte, udalak sanferminetako egitarau ofizialean sartu zuen Riau-riaua, berreskuratu nahian —duela hogeita bat urte antolatu zuen azkenekoz Iruñeko Udalak ekitaldi hori—. Istiluak izan ziren, eta bost lagun atzeman zituzten. Desordena publikoak eragitea eta udaltzainei eraso egitea egotzita, zortzi urte eta erdiko zigorrak eskatu ditu fiskalak hiru auzipeturentzat. Elkarretaratzea egin dute, hori salatzeko.
