Presoen senideen elkarteko Maider Alustizak adierazi duenez, Iñigo Urkullu Eusko Jaurlaritzako lehendakariak lan "agenda" bat zehazteko konpromisoa agertu die presoen sakabanaketa amaitze aldera. Bilera positibotzat jo du Alustizak, eta nabarmendu du "adosguneak" lortu dituztela zenbait gairen inguruan.
Presoen sakabanaketa da horietako bat. Alustizaren hitzetan, bilera "asmo adierazpen" soil bat ez izatea nahi zuten, eta iragarri du aurrerago beste bilera bat egingo dutela, lanean jarraitzeko.
Beste adosguneetako bat presoen senideen sufrimenduaren aitortza izan da, Alustizak jakinarazi duenez. Bileran, Urkulluk Zuzenbidea eta Hitzeman dokumentuak eman dizkie Etxerat-eko ordezkariei. Urkulluz gain, Jonan Fernandez Bake eta Bizikidetza idazkariak eta Monika Hernando Biktima eta Giza Eskubideen zuzendariak parte hartu dute bileran Jaurlaritzaren izenean. Etxerat-en ordezkaritza Jose Angel Aramendik eta Nagore Lopez de Luzuriagak osatu dute, Alustizarekin batera.
Jaurlaritzak ere bileraren inguruko balorazioa egin du. Ohar batean, azaldu du batzarra "modu adeitsuan eta eraikitzailean" egin dutela, eta "sakabanaketa eta urruntze politikak presoen senideentzat dituen ondorioen alde humanitarioa" aztertu dutela bereziki.
2014a, "urte ankerra"
Joan den abendua baino lehen eskatu zion Etxerat-ek bilera lehendakariari, haien urteroko txostena helarazi eta euskal presoen egoerari buruz hitz egiteko. Urtarrilean eman zuen baiezkoa Urkulluk, eta agendak zehaztu ostean ezarri dute bileraren data.
Iazko urteaz eginiko balantzean, 2014a presoentzat eta senideentzat "urte ankerra" izan zela adierazi zuen elkarteak. Haien eskubideen urraketak salatzeko, Bruselara joango da Etxerat-eko ordezkaritza bat datorren astean.
