Salamancako Artxibategiko dokumentuak berreskuratuko ditu EAJk

1936ko gerran konfiskatutako agiriak berreskuratuko ditu EAJk. Oroimen Historikoaren Dokumentazio Zentroko Batzordeak dokumentuen lekualdatzea onartu zuen, herenegun; batzordeko bi kidek kontra bozkatu zuten arren. Duela bost urte agiriak lekualdatzeko legea onartu zuten Espainiako Gobernuan.

Araba, Bizkai eta Gipuzkoako hainbat erakunderi eta Herrialde Katalanetan zenbait pertsona fisiko zein juridikori bahitutako dokumentuak Salamancako Artxibategian gorde zituzten. Oroimen Historikoaren Dokumentazio Batzordeak ohiz kanpoko bilera egin zuen herenegun, lekualdatzea onartzeko. Julian Lanzarote Salamancako alkateak eta Alberto Gutierrez Gaztela eta Leongo Kultura bozeramaileak lekualdatzearen kontra bozkatu zuten. EAJk «arretaz» hartu du lekualdaketa, «itzuliko dituzten bahitutako dokumentuak zeintzuk diren jakin arte». EAJk hamaika aldiz eskatu ditu konfiskatutako agiri eta dokumentuak. «Eskatutakoa itzultzen badigute, dokumentazio oso garrantzitsua berreskuratuko genuke».

Salamancako alkateak, Julian Lanzarotek, adierazi du agirien lekualdatzearekin Espainiako Gobernuak «nazionalistei ordaintzen» ari diela eta Kataluniako bozekin eta EAJrekin hitzartutako aurrekontuekin bat egiten duela. Gainera, lekualdatutako agiriak «baliorik gabekoak» direla esan du. Juan Vicente Herrera Castilla Lehoiko presidenteak adierazi du ondare historikoaren «suntsiketa» dela.