Donostian egin dute protestetarako deia, gaur goizean, Antiguako frontoian. "Salbuespenaren eta oinarrizko eskubide zibil eta politikoen egiturazko urraketaren argazkia helarazi nahi diogu euskal jendarteari", azaldu du Eleak-Libre mugimenduko ordezkari Aratz Zearretak.
Kalera irteteko premia gorria dela oroitarazi du, datozen hilabeteetan hainbat epaiketa egingo direlako; Askapenakoen kontrakoa heldu den astean hasiko da, eta Seguran (Gipuzkoa) Poliziak egindako sarekadako auzipetuen kontrakoa eta Ekin-eko ordezkariak epaituko dituena aurki espero dira. Horiek guztiek "salbuespen politiken hari bidegabeari" lotuta egindako urratsak direla deitoratu du: "Disidentziarako eskubidea bera ukatzen digute".
Auzipetuen izenean Askapenako ordezkarietako batek hartu du hitza, Unai Vazquezek. Aurrean dituzten epaiketen harira kikiltzeko asmorik ez dutela ohartarazi du: "Auzipetuok epaiketak eta espetxeratzeak otzantasunez eta etsituta onartu ditzagula nahi du estatuak. Baina ez dugu horrela egin eta aurrerantzean ere ez dugu egingo. Gure ustezko delituak aldarrikatzen jarraituko dugu, nork berea".
