Salatzaileak epaitegian ez deklaratzeko eskaria egin zioten Nafarroako Auzitegiari akusazioak, Fiskaltzak, herri akusazioek —Nafarroako Gobernua eta Iruñeko Udala— eta akusazio partikularrak, baina auzitegiak ezetsi egin du, akusatuek galdegin bezala. Aldiz, salatzaileak eta akusatuek elkar ez ikusteko neurriak agindu ditu. Hala, salatzaileak beste gela batetik jarraituko du epaiketa bideokonferentzia bidez, "abokatuekin beharrezkoa litzatekeen komunikazioa bermatuz".
Auzitegiaren autoak ezetsi egin du halaber, akusatuen mugikorretan atzemandako edukien zati bat froga gisa onartzea. Zehazki, 2016ko uztailaren 7a aurretik eta poliziak akusatuei mobila antzeman ondorengo edukia utzi du epaiketatik kanpo. Epaitegiak adierazi du baztertutako materialak ez duela loturarik epaituko diren gertakariekin.
