Miguel Sanzen agerraldia ez da ohiz kanpoko bilkura batean izango, ohiko saio batean emango baititu CANen gaineko azalpenak. Nafarroako Parlamentuko Bozeramaileen Batzordeak gaur azaldu duenez, ohiko agerraldi batean izan ohi den denbora izango du Sanzek azalpenak emateko: 30 minutu —20 inguru lehenengo eta beste 10 alderdiei erantzuteko txandarako—. Alderdiek zortzi minutu izango dituzte.
Bozeramaileen Batzordearen erabakiaren berri jakin ondoren, Patxi Zabaleta Aralar-Nabaiko bozeramaileak azaldu du ezarritako arauak "degradazio" bat direla, eta gaia ezin dela "horrela geratu". Zabaletaren iritziz, "20 minututan Nafarroako Kutxaren 13 urteko presidentetza azaltzea Guiness errekorrerako da".
Bilduko Maiorga Ramirezek salatu du auzia "amaitutzat jo" nahi dutela 20 minututan.
