"Arrakastatsua, jendetsua, ozena...". Hala definitu du Sare plataformak joan den larunbatean larri gaixorik dauden hamar presoak kaleratzeko eskatuz Donostian egin zen manifestazioa, hedabide batzuek ziotena jasoz. "Salatzen dut dinamika aurkeztu genuenean, entzun eta sentituko gaituztela esan genuen. Eta, gure ustez, hori lortu genuen larunbatean", esan du Sarek, Donostiako prentsaurreko batean. "Ideologiaz gaindi, gaitz larriak dituzten euskal presoen askatasun eskaera nabarmendu nahi izan zenuten milaka pertsonei, eskerrik asko". Sareren arabera, "aktibazio ziklo berri bat irekitzea" lortu da. "Baina oraindik bide luzea dago egiteko".
Sarek adierazi du Aieteko nazioarteko konferentziatik bost urte pasatu badira ere oraindik gatazkaren ondorioak konpondu gabe daudela; "Madrilen eta Parisen arduragabekeriagatik eta mendekuagatik, konpondu gabea". Gogorarazi du sakabanaketak hor segitzen duela, senideen eta lagunen istripuak gertatzen direla, gaixorik larri daudela preso batzuk... "Ondoriozta dezakegu espetxeetan giza eskubideak urratzen jarraitzen dutela; gainera, datu batzuek adierazten dute egoerak okerrera egin duela. Hori ikusita, ezin gara eskuak gurutzaturik egon. Euskal gizarteak asko du egiteko, asko esateko, eta, horregatik, larunbatean abiaturiko bidea urrats garrantzitsu gisa baloratzen dugu".
Eskubide urraketei amaiera emateko asmoz, gutxiengo batzuk adostea eskatu die alderdi eta instituzioei.
Larunbateko martxaren helburu berarekin, Bagoaz-ek manifestaziora deitu du azaroaren 19rako, Baionan .
