Sareko eledun Bego Atxak eta Joseba Azkarragak ETAren amaieraren osteko egoera berriaren irakurketa egin dute. Esan dute daborduko "aitzakia guztiak" amaitu direla, eta gogora ekarri dute PPko Borja Senperrek behinola adierazitakoa, ETA desagertuz gero sakabanaketa "48 orduan" amaituko zela, alegia: "ETA desagertutakoan, jada ezin da 'ETAko presoez' hitz egin", esan dute. "Orain, presoen auzia ardura kolektiboa da, eta, sakabanaketak bere horretan jarraitzen badu, presoak ere biktima izango dira".
Joan den ostiralean Eusko Jaurlaritzako lehendakari Iñigo Urkulluk eta Uxue Barkos Nafarroakoak presoen inguruan esandakoak ontzat hartu ditu Sarek, eta eskaera formala egin die biei bilera egiteko, "haien asmoen berri izan eta Sarerenak ere haiei jakinarazteko" xedez.
Hainbat eskaera jarri ditu Sarek mahai gainean, "ireki den aro berrian" lehenbailehen gauzatzeko: gaixo handi diren presoak eta adinekoak berehala askatzea, presoak Euskal Herrira gerturatzea, espetxe arloko eskumenak euskal instituzioen esku uztea eta presoen zaintza Auzitegi Nazionaletik gertuko epaileen eskuetara pasatzea, gradu aldaketak onartzea, salbuespen legedia bukatzea eta, azkenik, horretan oinarrituta egin edo tortura salaketak tarteko diren auzi eta zigorrak berriro aztertzea.
