Eusko Jaurlaritzako Segurtasun sailburuorde Josu Zubiaga elkarrizketatu dute Onda Vasca irrati katean. Esan duenez, Aske Guneak "era baketsuan" amaitu behar du "denon hobebeharrez". Gaineratu du Ertzaintzak "modu ordenatu batean konpondu" nahi duela egoera.
Ertzaintzak Espainiako auzitegien agindua beteko duela ere berretsi du Zubiagak. Esan du Ertzaintzak legeriaren arabera eta "errealitate sozialarekin batera" jokatzen duela, eta agindu judizialak beteko dituela, "bere eginbeharra delako".
PPk, berriz, "akats politikoa" iritzi dio Alkorta oraindik ez atxilotzeari. Nerea Llanos PPko legebiltzarkideak uste du "minuturo ETAren erronka loditzen" ari dela Ertzaintza haren bila ez badoa. "Beltran de Herediari hainbeste gustatzen bazaio Polizia ingelesaren eredua, esan behar zaio bobbyek honezkero atxilotu zutela".
