Sei adingabeko atxilotu dituzte Gasteizen, ibilgailuak harrikatzea egotzita

15 eta 17 urte bitarteko sei gazte atxilotu ditu bart Ertzaintzak Gasteizen, N-1 errepidean, Abetxuko parean, igarotzen ari ziren ibilgailuei eraso egitea leporatuta.

Ertzaintzak azaldu duenez, bart gaueko hamabi eta erdiak aldera N-1ean autoan zihoazela harriekin eraso dietela esanez deitu diete zenbaiat lagunek. Dei horiek jaso eta segituan, esandako lekura joan dira Ertzaintza zein Gasteizko Udaltzaingoa, haiek ere jaso baitituzte salaketa deiak. Tamaina handiko harriak eta su itzalgailu bat aurkitu dituzte errepidean, eta baita harrikadaka hondatutako zenbait auto ere.

Inguruak miatzen hasi, eta susmagarri gisa atxilotu dituzten hiru adingabeko aurkitu dituzte udaltzainek. Handik gutxira beste hiru gaztetxo topatu ditu Ertzaintzaren patruila batek, eta bati su itzailgailu baten segurtasun uztaia aurkitu diote. Erasoetan parte hartu dutelakoan atxilotu egin dituzte haiek ere.