Sei gizon atxilotu dituzte azken astean Hegoaldean genero indarkeria egotzita

Ertzaintzak eta Foruzaingoak sei gizon atxilotu dituzte asteon emakumeen aurkako indarkeria egotzita. Getxon (Bizkaia), 46 urteko gizon bat atzeman zuten astearte goizaldean, ustez bikotekideari tratu txarrak emateagatik. Andrea kalean aurkitu zuten, begietan eta aurpegian kolpeak zituela. Emazteari mehatxu egin eta tratu txarrak ematea egotzita, halaber, 39 urteko gizon bat atzeman zuten egun berean Bilbon. Donostian beste bi gizon atxilotu zituzten: batek ustez ukabilkadak eta ostikadak eman zizkion bikotekideari; besteari urruntze agindua haustea egotzi diote. Foruzainek Cintruenigon eta Esteribarren egin dituzte atxiloketak. Seme-alabei ere tratu txarrak ematea egotzi diote Cintruenigon atxilotutakoari.