EAEko Ahal Dugu-k datorren ostiraletik igandera egingo ditu hauteskunde primarioak Eusko Legebiltzarrerako bozetan lehendakarigai nor aurkeztuko duen erabakitzeko, eta zerrendak ere zehazteko. Jakinak ziren hiru hautagaitza: Pili Zabala buru duena eta zuzendaritzak proposatutakoa, Juan Luis Uriarena —zuzendaritzarekiko Kaliangora korronte kritikoak sustatutakoa— eta Ruben Belandiarena. Hirurek taldeak ere aurkeztu dituzte, eta alderdiak kideen berri eman du (zerrendak).
Zabalaz, Uriaz eta Belandiaz gain, hiru hautagai independente aurkeztu dira primarioetara: Zaloa Aizpiri Agirre, Manuel Garcia Alfaro eta Olga Uruñuela Cuenca.
Kanpaina bihartik igandera bitarte egingo da, eta emaitzak datorren astelehenean jakingo dira.
Udazkenean izango da Eusko Legebiltzarrerako bozak. Espainiako Kongresurako ekaineko hauteskundeetan Elkarrekin Ahal Dugu koalizioa izan zen EAEko lehen indarra, botoetan —%29— eta diputatuetan; hiru herrialdeetan nagusitu zen.
