Gaur hasi dute Araban, Bizkaian eta Gipuzkoan milaka ikasleren etorkizuna markatuko duen proba. Hain zuzen, 12.782 ikasle hasi dira selektibitatea bezala ezaguna den USE Unibertsitatera Sartzeko Ebaluazioa egiten. Nafarroako ikasleek iragan astean egin zuten proba, eta etzi jakingo dute zer emaitza lortu dituzten.
Gaurtik hasita hiru egunez, USEko azterketak egiten arituko dira Batxilergoko 11.947 ikasle eta Lanbide Heziketako 835. Gainera, 626 nota igotzera aurkeztuko dira irakasgai batzuetara. Azterketari gehienak emakumeak dira —Lanbide Heziketako ikasleen %69 eta Batxilergokoen %57—. Hizkuntzari dagokionean, proba euskaraz egitea erabaki dute ikasle gehienek: Batxilergoko ikasleen %75ek eta Lanbide Heziketako %55ek egin dute hautu hori.
Lurraldeei erreparatuz gero, Bizkaiko campusak jasoko ditu ikasle gehien (6.385), 4.618k egingo dute Gipuzkoan, eta 1.731k Araban. Orotara, iaztik %1,49 hazi da izen-emate kopurua.
Iazkoa bezala, koronabirusaren pandemiak eskatzen dituen babes neurrietara egokitutakoa izango da aurtengo proba ere. EHU Euskal Herriko Unibertsitatearen campusak ez ezik, BEC, Ficoba eta Iradier Arena ere erabiliko dituzte. Gainera, iaz azterketetan egindako aldaketak mantentzea erabaki dute, ikasleek aukera gehiago izan ditzaten.
