Iruñeko Udalak jakinarazi duenez, larunbat gauean "intentsitate handiko" sexu eraso baten berri jakin zuen udaltzaingoak. Alde zaharreko etxe batean gertatu zen; Poliziaren arabera, 31 urteko gizon batek eraso egin zion 27 urteko emakume bati, eta poltsa ostu zion. Etxetik joan zen gero, eta udaltzaingoak biharamunean atzeman zuen. Aurretik ezagunak ziren biak, udalaren arabera.
Horrelako kasuetarako protokoloari jarraituz, udaleko bozeramaile batzordeak bilera egin du, eta protestara deitu du. Biharko egin du deia: 12:00etan bilduko dira udaletxeko plazan.
