"Hirugarren munduko egoera hau jasangaitza da, gaixoei ezin baitzaie egonaldi duinik eskaini. Gaixoaren intimitate eta konfidentzialtasun galera ere badakar". Hala esan dute ohar bateratu batean ESK, SATSE, ELA, UGT, LAB eta CCOO sindikatuek. Gurutzetako Ospitaleko (Barakaldo) larrialdiak "kolapsatzea" maizegi gertatzen den egoera dela salatu dute, eta gaixoak korridorean daudela lan egitera behartzen dituela langileak. Gogorarazi dute unitate batzuk itxita daudela, "dirua aurrezteko xede bakarrarekin".
Sindikatuen arabera, langileak presio psikologiko "gogorra" ari dira jasaten, dituzten baldintzak direla eta. Akatsak egiteko aukera ere modu horretan handiagoa dela ohartarazi dute.
Testuinguru horretan, sei sindikatuek ospitaleko zuzendaritzari eskatu diote itxita dauden unitateak zabaltzeko eta beharrezkoak diren kontratazioak egiteko.
