Koronabirusa zabaltzen ari da Mungian (Bizkaia). Azken astean, 135 kasu baieztatu dituzte herrian, Eusko Jaurlaritzako Osasun Sailaren datuen arabera. Hala, azken zazpi eguneko tasa 77,81 kasu litzateke 10.000 biztanleko. Gorakadaren seinale da ateak itxi dituen lehen zentroa izan dela herri hartako Bentades ikastetxea, ikasturtea hasi eta bi egunera. Gainera, gaur jakinarazi dute Soietxeko Espainiako Armadaren kuartelean sei positibo atzeman dituztela. Horren eraginez, 60 militarrek berrogeialdia egin beharko dute.
Soietxeko kuartelean 550 militar inguru daude, bost konpainiatan banatuta, eta, El Correo egunkariak argitaratu duenez, horietako bateko sei kidek positibo eman dute COVID-19a atzemateko PCR proban. Gauzak hala, haiekin kontaktuan egon diren kideek berrogeialdia egin beharko dute. Horiek euren etxeetan bakartuko dira. Positibo emandakoetako hiru, berriz, kuartelean daude bakartuta.
Astelehenean ez zen apenas militarrik agertu bere postura, Soietxeko arduradunen aginduz, eta atzotik neurri bereziak hartuta ari direla adierazi dute.
Sei kasuetatik lau Mungiako Goieta tabernan sortutako agerraldiari lotuta daude. Hilabete hasieran, Eusko Jaurlaritzako Osasun Sailak eta Osakidetzak abuztuaren 21etik 26ra bitartean taberna hartan egondakoei PCR proba egiteko eskatu zieten, gutxienez bi langilek eta lau bezerok positibo eman baitzuten. Proba egin zuten 240 herritarretatik zazpik eman dute positibo.
Taberna hartako agerraldiaz gain, beste bat ere atzeman dute herriko San Jose-Etxe Alai zahar etxean, aurreko astean. Gutxienez 20 kasu baieztatu dituzte egoitzako egoiliarren artean.
