Eusko Jaurlaritzako Bake eta Bizikidetzarako lantaldeari "inolako baliorik" ez dio ikusten Idoia Mendia PSE-EEko bozeramaileak, ponentzia horretan soilik EAJk eta EH Bilduk parte hartzen badute. Hala adierazi dio Efe berri agentziari.
Mendiak azaldu duenez, PSEk uko egingo dio lantaldean parte hartzeari, ezker abertzaleak aitortu arte ETAren jardun armatua "zentzugabea" izan zela, eta ezker abertzaleko ordezkari politikoek "ortodoxia jarrerak eta iraganeko diskurtsoak" baztertu arte.
"Gaur-gaurkoz, ez daude baldintzak guk lantalde horretan eserita jarraitzeko", esan du Mendiak. Iazko irailean utzi zion PSEk lantaldean parte hartzeari. PPk eta UPDk iazko apirilean baztertu zuten bertan parte hartzea. Beraz, soilik EAJ eta EH Bildu daude lantaldean, eta Mendiak uste du hori horrela izateak "ahuldu" egingo lukeela balizko akordio bat.
"Lantalde horrek ez du inolako funtzionamendurik, ezta printzipio politikoetan baliorik, ez gaudelako bertan eserita ideia politiko ezberdinen ordezkari guztiak", gaineratu du. Haren ustez, "logikoa" izango litzateke koalizioa lantaldetik joatea "zoru etikoa" ez onartzeagatik.
Halaber, Mendiak uste du "aukera historiko" bat galtzen ari dela alderdien artean jarrerak adosteko.
