Prentsaren aurrera agertu zen atzo Insausti. Aldamenean izan zituen etorkin adingabeekin lan egiten duten Bideberri, Dianova, Horbel eta Urgatzi-Babesten enpresetako 30 bat hezitzaile eta langile. Mahaian eserita etorkin adingabeen programaz arduratzen den Yolanda Perez eta Urgatzi-Babesten enpresako Mikel Lizarralde eta Agurtzane Garcia. Urgatzi-Babesten enpresak kudeatzen ditu Debako Oilur eta Elgetako Aixola zentroak. Debako zentroak «bere helburua» bete duela adierazi, eta bertan egindako lana defendatu dute guztiek.
«Komunikabideetan agertu denaren larritasunagatik agertu gara hedabideen aurrean», adierazi du Insaustik, prentsaurrekoaren berezitasuna nabarmenduz. Diputazioak eztabaida saihestu duela ohartarazi du, «SOS Arrazakeriako pertsona batzuek ahalegina egin dute, ordea, hezitzaileen lana hondatzeko, eta hezitzaileen lana zalantzan jarri du». Eta horri erantzun argia eman nahi izan dio Diputazioak. Insaustik azaldu du eztabaida mediatikoak ez diola gaiari eta hezitaileen lanari mesederik egiten. Baina hezitzaileen lana eskertu eta babestu beharra dagoela uste du: «Erabat minduta eta nazkatuta daude hezitzaileak». Oilur zentroan lanean aritutako hamalau hezitzailek ere agiria aurkeztu dute, Debako zentroko lana babesteko, eta SOS Arrazakeriari erantzuteko.
«Mesede egin dio sareari»
Oilur zentrotik «30 eta 40 gazte artean» igaro dira. Lauk izan ezik, beste guztiek gizarteratzeko bidea hartu dutela jakinarazi du Insaustik: «Gutxi batzuek ez dute aukera baliatu. Ez dute nahi izan, edo, agian, ez diete utzi. Baina inork ezin du ukatu aukera eman diegula. Debako programak mesede egin dio sare guztiari». Aixola zentroko zuzendari Agurtzane Garciak baieztatu egin du hori. Debako zentroak «lan ona eta eraginkorra» egin duela azaldu du.
Etorkin adingabeak artatzeko sarearen barruan hiru zerbitzu daudela oroitarazi du Insaustik: oinarrizkoa, terapeutikoa eta espezializazio handikoa. Azken programa horren barruan sortu zen Debako Oilur zentroa. «Portaera gatazkatsu disruptiboak, kontsumo arazoak, gizartera egokitzeko zailtasunak eta delituak» egin zituzten hogei bat gazterentzat zabaldu zuten. «Debako zentroaren funtzioa adingabeak berregokitzea da», zehaztu du Insaustik. Programa berezi guztietan, bai helduekin, bai adingabeekin, «pertsona berreskuratzea» izan ohi da lehen ahalegina, Insaustiren hitzetan, «gero beste heziketa eta aisialdi jarduera batzuei ekiteko. Lehenik isolatu egin behar da arazoak dituen pertsona hori, izaera lantzeko eta bere arazoei begira jartzeko».
«Adingabeek eskubideak dituzte, baina baita betebeharrak ere», nabarmendu du Insaustik: «SOS Arrazakeriak egin duen txosten horretan ez zaio aipamen bakar bat ere egiten adingabeen betebeharrei». Hezitzaileak eta beste zerbitzuetako adingabeak «arriskuan» egon izan direla nabarmendu dute, eta hori ez dela SOS Arrazakeriaren txostenean ageri. Debako gazteei tratu txarrak eman izana ere ukatu egin dute. Mikel Lizarraldek ohartarazi du berriz ere salaketa anonimoak jasotzen badituzte, epaitegietara joko dutela.
SOS Arrazakeria: «Diputazioak ez die gure salaketei erantzun»
Gipuzkoako Diputazioak agerraldia egin eta ordu gutxira erantzun du SOS Arrazakeriak.Nabarmendu du Diputazioak ez diela taldearen «salaketa zehatzei eta Arartekoaren kritikei erantzun». Adierazi du taldeak ez duela hezitzaileen lana zalantzan jarri, kontrara, hezitzaileen lana «gakoa» dela. Gainera, ohartarazi du eskubideak ezin direla betebeharren mende jarri. Eta erantsi du zerbitzuok publikoak izan behar dutela, ezin dutela enpresa pribatuen esku egon.Debako zentroko hezitzaileen agiria
Debako Oilur zentroan lan egindako hamalau hezitzailek, SOS Arrazakeriaren txostenari erantzuteko kaleratu duten agiriaren pasarteak:(...) Endoia egoitzako programa espezializatuaren lehenengo faseak emaitza onak izan ditu, eta aurreikusitako funtzioa bete du (...).
Egoitza honetan ez zaie sekula tratu txarrik eman adingabeei. Bertan bizitako adingabeek jarrera arazo larriak zituzten, eta etengabe (...) izaten genituen mehatxuak, erasoak eta irainak. Hori ez du aipatzen [SOS Arrazakeriaren] txostenak (...).
Gure profesionaltasuna zalantzan jarri dute, eta hori onartezina iruditzen zaigu. Ahal izan dugun ondoen egin dugu lan (...), eta gure osotasun fisikoa arrisku larrian jarri dugu askotan. Hori horrela izanik ere, pertsona eta profesional gisa daukagun onena ematen saiatu gara (...).
Adingabeen eskubideak errespetatzea eskatzen duzue, baina ez ahaztu eskubideak baliatzeak berarekin dakarrela adingabe guztiek, herritar diren aldetik, dituzten erantzukizunak beren gain hartzea. Betebehar horiek dituztela irakatsi egin behar zaie (...).
Gu ere, zuek bezala, kezkatuta gaude adingabe horiek haserre askoren jomugan daudelako, eta horrek are gehiago zaildu dielako berez zaila den gizarteratzeko prozesua. Baina uste dugu zentroarekin zerikusirik ez duten erakundeen jarrerak (SOS Arrazakeria haien artean) ekarri duela, hein handi batean, adingabe horiek haserre askoren jomugan egotea (...).
(...) SOS Arrazakeriari eskatzen diogu (...) proposatzeko heziketa neurri zehatzak jarrera arazo larriak dituzten adingabeen jarrera erasokorrez kontzientzia hartzeko, erantzukizunak hartzeko eta jarrera horiek bideratzeko.
