Soto eta Zeberio bahitu egin zituzten, torturatu, desagerrarazi eta hil. Urteetan ez zituzten haien gorpuzkiak aurkitu. Haien lagun min baten bizitza, Diego Lazkanorena, markatuta geratuko da betiko. Twist nobelaren hari nagusia da. Soto eta Zeberio izan zitezkeen Joxean Lasa eta Joxi Zabala.
Harkaitz Canok liburuan errealitatetik eraiki du fikzioa, baina errealitatea askoz ere gordinagoa da "Lazkanorena baino askoz ere gogorragoa izan da. Nire etxean ez zen hitz egiten gertatuaz. Edozer gauza egiten nuen ihes egiteko". Pili Zabalaren hitzak dira, Joxi Zabalaren arrebarenak. 29 urte bete berri dira haiek desagerrarazi zituztela. Kontatu beharreko zerbait zela sinetsita zegoen Cano. Eta Zabalak eskertu egin dio: "Nik nahi nuen istorio hori kontatzea. Hau argitaratuta ikustean liberazio handia eduki dut".
GALek 1983an bahitu zituen Lasa eta Zabala, eta torturatuta hil zituen. Bien gorpuzkiak Alacanten (Herrialde Katalanak) azaldu ziren, 1995ean.
Pili Zabalarekin eta Harkaitz Canorekin izan da BERRIA, eta bihar bi orrialdeko erreportajea argitaratuko du Igandea gehigarrian. Aurrerapena da hau.
