"Subiranistak elkarrekin aritzeko" proposamena aurkeztuko du EAk

Pello Urizar EAk idazkari nagusiak "subiranistak elkarrekin aritzeko" proposamen politikoa aurkeztuko hilaren 21ean, alderdiaren izenean. "Elkarlan hori egitera behartuta gaude, Eusko Jaurlaritza ez-zilegiak Euskal Herria Espainiako Estatuarekin uniformizatu egin nahi duelako, gehiengoaren aurka", adierazi du gaur Urizarrek Bilbon egindako prentsaurrekoan. Haren arabera, Jaurlaritzak "bakeari eta normalizazio politikoari" ere ez die ekarpenik egingo.

Hala, indar subiranistak "erantzun tinkoa" eman beharrean daudela uste du EAko idazkari nagusiak. "Hori da elkarlanaren lehen helburua". "Bide politikoak eta baketsuak" baino ez dira erabili behar horretarako, EAk dioenez.

Proposamena osatzeko asteak daramatza EAk barne gogoetan, bilerak egiten. Hilaren 21ean jendaurreko konferentzia politikoa egingo du, eta alderdi abertzale "denak" gonbidatuko ditu, bere ondorioen berri bertatik bertara izan dezaten. Beste alderdiei jarrera "argitzeko" eskatu die Urizarrek.