«Ez dago Baionako festarik 2020an», adierazi dute Jean Rene Etxegarai alkateak eta Herve Jonathan Pirinio Atlantikoetako suprefetak gaur goizean. Ez da gaurko albistea, udalak apirilean utzi baitzituen bertan behera uztailaren 29tik abuztuaren 2ra egitekoak ziren festak, baina, egun horietarako hiru aste falta direla, segurtasun neurri bereziak aurkeztu dituzte, tabernetako, jatetxeetako eta peñetako ordezkariekin batera egin duten agerraldi batean.
«Festarik ez egoteak ez du esan nahi bizitza geratuko denik. Baina osasun arauak bete egin behar dira», esan du Etxegaraik. Neurri zorrotzak hartu dituzte egun horietako egoera kontrolatzeko: tabernak eta jatetxeak 23:00etarako itxi beharko dituzte; saltokietan ez dute edari alkoholdunik salduko 15:00etatik aurrera; ezingo da alkoholik edan kalean; eta ezingo da musikarik jarri kalean, ez zuzenekoa, ez erreproduzitutakoa. Gainera, Owen Lagadec-Iriarte Baionako peñetako lehendakariak adierazi du peñak itxita egongo direla.
Jonathanek suprefetak esan du «ez-festetan» taberna eta jatetxeek ez luketela jendea bildu behar «eskaintza komertzialekin edo zerbitzu bereziekin». Poliziaren presentzia nabarmena izango da: «Talde handi bat egongo da distantzia fisikoa errespetatzen ez duten multzoak elkartzea eragozteko», haren hitzetan. «Kontzientzia eta ardura» eskatu die herritarrei.
