Nekane Murga Eusko Jaurlaritzako Osasu sailburuak prentsaurreko batean iragarri du neurri murriztaileak zehazten dituen dokumentu bat argitaratuko duela Jaurlaritzak asteon, eta astebururako neurri horiek martxan izango direla. Dokumentu horretan jasoko diren neurri batzuk, baina, agerraldian aurreratu ditu: taberna guztiek 1:30ean itxi beharko dute, eta ezingo dira ireki goizeko seiak baino lehen. Diskotekei dagokienez, edukieraren %60 bete ahal izango dute soilik, eta ezingo da dantzalekua erabili, mahaietan egoteko ez bada.
Era berean, gauerditik aurrera ezingo da kontsumitu mahaietan eserita ez bada, barruan zein terrazetan. Ehun pertsonatik gorako edukiera duten jatetxe eta tabernetan, edukierak ezingo du %80 gainditu eta mahaietan ezingo dira hamar pertsona baino gehaigo eseri.
Aisialdiari eragiteaz gain, pilaketak sortu daitezkeen beste eremuetan ere aplikatuko dira neurriok: besteak beste, beilatokietan eta hiletetetan. Beilatokietan, edukiera gehienez ere 60 pertsonakoa izango da, eta ezingo du edukieraren %60 gainditu, eta hiletetan ere 60 pertsona bildu ahalko dira gehienez ere. Bestalde, gazte lokalak erabiltzea debekaturik egongo da.
Agerraldiak izan diren udalerrietan neurri murriztaileak ezarri zituen jaurlaritzak aurreko astean. Bergaran eta Tolosan (Gipuzkoa) egoera epidemiologikoak hobera egin duenez, bertan behera geratuko dira aurreko astean ezarritako neurriak, Jaurlaritzak agiria ateratzen duen momentutik. Eibarren, Zarautzen (Gipuzkoa) eta Ermuan (Bizkaia), aldiz, neurri horiek indarrean jarraituko dute oraindik ere.
