Baiona handiko eta txikiko terrazak jendez bete dira goizean. Zerbitzarien joan-etorriak berriz hasi dira, eta hainbat saltokik aitzindegiak zabaldu dituzte azkenean. Azken zazpi hilabeteetan ikusi gabeko irudia eman du goizak Lapurdiko hiriburuan. Neurrien arintzearen bigarren fasea hasi da gaur Ipar Euskal Herrian, eta, sektore batzuen irekieraz gain, etxeratze agindua 21:00etan izanen da ekainaren 9ra arte.
Halere, eguraldiak baldintzatuko du eguneko giroa: terrazak bakarrik ezin izan dituzte ireki ostalariek, edukieraren %50ean. Ostalari anitz euriaren beldur dira: goizeko kafearen tenorean eguzkia atera bada ere, zaparradak iragarri dituzte arratsaldera arte. Dena den, aroak ez ditu bezeroak beldurtu: «aspaldiko partez» berriz elkartu dira mahai inguruan, betiere sei lagun gehienez.
Baionako Les Pyrenees ostatuan kafea hartzera bildu da Luis Hariztoi ikaslea. «Ostatuak biziki inportanteak dira elkarren arteko harreman sozialetarako. Ikasle anitz biziki bakartuak egon dira, eta arrunt baldintzatuak neurriengatik. Ostatuen irekiera, alde horretatik, arras garrantzitsua da», azaldu du.
Neurrien arintzearekin, bestalde, kulturguneak ere zabaldu dituzte gaur. Zenbait egitura asteburu honetan hasiko dira berriz programazioarekin, hala nola Miarritzeko (Lapurdi) Atabal musika gela. Baionako Atalante zinema gelan, berriz, gaur ekin diote berriz filmak proiektatzeari.
