Tiroketan parte hartu zuten ETAko kideak hiru zirela dio Jaurlaritzako Herrizaingo Sailak

Tiroketanl ustezko erasotzaileetako bat hil zen, eta bi ertzain zauritu —haietako bat larri—. Espainiako Barne Ministerioak atzo jakinarazi zuenez, Arkaitz Otazua 24 urteko bilbotarra da hildakoa. Ihes egin duenetako bat, berriz, Asier Mardones. Herrizaingo Sailak ez du oraindik inoren izenik eman. Hirugarren laguna nor izan daitekeen argitu gabe dago oraindik.

Herrizaingo Sailak gaur emandako azalpenen arabera, Errioxako etxebizitza horretan atentatuari buruzko krokis bat aurkitu dute, eta ustezko hiru erasotzaileek larunbatetik igandera bitarteko gaua han igaro zutela ziurtatu dute.

Gaur goizaldean, berriz, Asier Mardonesen arrebaren etxea miatu dute Basaurin.Polizia iturirek Efe agentziari jakinarazi diotenez, agiriz betetako hainbat kaxa atera dituzteetxebizitza horretatik.

Mardonesen arrebarena ez ezik, beste zenbait etxebizitza miatu zituzten atzo ertzainek, hala nola, tiroketa horretan hildako Arkaitz Otazua ustezko etakidearen gurasoena, zein Mardones beraren gurasoena. Halaber, Errioxako Entrena herrian, Otazuaren gurasoena den etxe bat miatu zuen Guardia Zibilak.

Bestalde, goiza argitzearekin batera Asier Mardones gaztea bilatzeko operazioari ekin dio Ertzaintzak Herrera mendate inguruan. Hala, kontrol ugari jarri dituzte han inguru guztian, eta Toloño mendikatea arakatzen ari dira txakurren etahelikopteroen laguntzarekin. Nolanahi ere, atzo ziurtzat ematen zen Mardonesek oinez ihes egin zuela. Orain, ostera, taldea hiru lagunek osatzen zutela zabaldu eta gero, hirugarren lagunak Mardonesi auto batekin ihes egiten lagundu ote dion aztertzen ari da Polizia.