Festa lehertuko da bihar eguerdian Tolosan (Gipuzkoa). 12:00etan hasiko dira inauteriak, eta BERRIAk, Tolosaldeko Ataria-k eta Tolosako Udalak zuzenean emango dute txupinazoa euren webguneetan, elkarlanean, BerriaTBren bitartez. Saioa, gainera, Ataria irratian ere entzungai izango da.
Ataria-k prestatu du saio berezia, eta udaletxetik bertatik ariko dira. Txupinazoaren aurretik eta ondoren, Tolosako zein inauterietako protagonista nagusiei elkarrizketak egingo dizkiete, tartean Ibai Iriarte alkatea, eta inauteriei buruz aurrez prestatutako erreportajeak eta elkarrizketak eskainiko dira.
Bi astekari berezi
Tolosaldeko Ataria sei egunez jaian murgilduko da. Webgunean etenik gabe ikusi ahal izango dira inauteriei buruzko azken berriak, argazkiak eta bideoak. Sei egunetan, Tolosako hainbat txokotan antolaturiko ekitaldiak eta inauteriek eurek sortzen dituzten uneak jarriko dira ikusgai.
Ataria-ren paperezko euskarria ere berezia izango da inauterien ingurumarian. Atzo, 32 orrialdeko astekari berezia argitaratu zuten, eta hurrengo astekari berezia martxoaren 5ean argitaratuko da, Hausterre Egunean. Tolosako inauteriak ez ezik, eskualdean inauterien karietara eginiko ekitaldiak ere jasoko dira bertan.
