Zizurkilen, Joxe Arregiren izena duen plazan omendu zuten Arregi zena atzo. 32 urte bete ziren iragan asteazkenean hura torturatuta hil zutela, eta tortura behin betiko amaitzeko eskatu zuten ekitaldi horretan.
Tortura "sistematikoa" izan dela eta denboran ez duela etenik izan salatu zuen Egiari Zor fundazioko Nagore Mujikak. Oroitarazi zuen 4.800 tortura kasu egiaztatuta daudela eta, kalkuluen arabera, 10.000 euskal herritar inguru torturatu dituztela 50 urtean. 11 hil dira horrela, eta haien senideek lore bana utzi zuten atzoko ekitaldian.
"Oso latza izan da" esanez hasi zuen hitzaldia Mujikak, Arregi zenaren hitzak gogora ekarriz. Mujikak azaldu zuen Espainiako gobernu guztiak izan direla salatuak tortura kasuengatik: "Torturak bere horretan iraun du". Halaber, etorkizun baketsu bat eraikitzeko ezinbestekotzat jo zuen Espainiak praktika hori aitortzea.
